Ver, Prins Christian d’r 1e beij de gratie van d’r Road van Illef, prins van de Breuzelère 2025.
Ridder in de orde van de Teutevègere,
Groeëtvorst van de Malleziep bis an de Commersjtroat en de rest va Mechele, Besjermheer van ut Ankie, mieng prinses,
Zoon van d’r Hein en ut Margriet,
Leefhebbende broor van ut Sabine,
Patron van os patekinger Bram, Julian, Luca en Kristy,
Vurzitter van CV de Breuzelère,
Medeoprichter en topatleet van KC Sjeef igezat,
Vurvechter van gezelligheed en u good glaas beer,
An alle die dit zulle zieë, huuüre of leaze: ALAAF!
Zoeë is ut dat ver in uvverweaging genoame en besjloate hent:
Artikel éé:
Noa 12 joar officieel beij de Breuzelère woad ut toch uns tied,
Prins weade van ut sjunste durp is ut woeër make van inge groeëte dreum, dat wool ich effe kwiet!
Artikel Tweij:
Durch ut joar hee verknocht an Chinees of ing friet zoervleisj mit mayonaise,
Mer dat loop ver mit de carnaval allemoal draaf veurop in de polonaise!
Artikel Drîj:
Niets is sterker dan dat ene woord: Feyenoord, vroagt uch dat mer neet aaf,
Mer toch is d’r vur os éé sjterker woord en dat roope ver hieël erg geer:
ALAAF!
Artikel Veer:
Durch ut joar hee kin der mieng prinses en mich mit d’r motor durch ut Heuvelland zie cruise,
Mer mit de carnaval wille ver mit uch in de polonaise flink goe broeze!
Artikel Vunnef:
Ver amusere os went ver fietse, renne, badmintonne en noa ’t kegele gunt,
Mit de carnaval hope ver och dat gikkeringe zich amuseert, of ze noe polonaise loape of lever a gen theek sjtunt.
Artikel Zès:
Normaal gun ich op tied noa heem en bin d’r daag d’rnoa ummer fit,
Mèr leef Breuzelère, dit joar gun ich uns néét es usjte noa bid!
Artikel Zuvve:
Op de golfbaan i Gemmenich en Florida howwe ver durch ut joar hee minnig baal aaf,
Mer mit de carnaval blieve ver i gen durp en roope ver: ALAAF!
Artikel Ach:
Op skivakans in Oosteriek zunt ver vural good in der après-ski,
Mit de carnaval i Mechele ving der os in os residentie d’r Peadsjtaal, A gen Sjoeël of beij de Commanderie!
Artikel Nuung:
D’r Pappesjweag hat vurrig joar hun veer hoogheden in de sjtroat flink kinne eere,
Mer noe is ut gelukkig wir tied dat de sjunste en gezelligste Commersjtroat moag seere!
Artikel Tieën:
Durch ’t joar hee makt mieng prinses sinds u tiedje moeziek bie de harmeneij op zieng klarinit,
Mer mit de carnaval lut ‘t die heem en zinge ver same alle carnavalsliedjes mit!
Artikel Illef:
Zo, genog gebreuzeld, ut is noe tied vur muziek, sjpass, plezeer en u glaas beer, doarum sjleete v’r noe aaf,
Mit u 3 moal kreftig:
MECHELE ALAAF! BREUZELÈRE ALAAF! CARNAVAL I MECHELE ALAAF!
Prins Christian d’r 1e President André